أنت تتصفح حاليا أرشيف شهر November, 2007.
مافي حياتي شىٍ اسمه مستحيل
وفيني شغف ممشى الدروب الموعره
تملكتني منذ فترة هواية جديدة وهي هواية التصوير, وهذه الصورة هي آخر محاولاتي واتمنى ان اكون وفقت بها, بانتظار آرائكم وانتقاداتكم وتقييمكم وليكن من 10, علما بأنني انا من في الصورة 
لسلام عليكم ورحمة الله وبركاته ,,
صباحكم عسل ان شاءالله ..
بتكلم اشوي بالعامية وباخلي العربي الفصيح لأهله هالمرة .. شخباركم وشمسوين بصراحة قاعد من وقت وماعندي شي اسويه ,, قمت خذيت لي دوش المفروض يكون سريع بس اشوي طولت ,, ونظفت غرفتي وبخرتها وعملت لي كوب شاي وكلت حمص بالغلط !! شفته في الثلاجة على بالي طبق حلاوة بصراحة ,, على بالي sweet .. مادريت انه حمص !! 
انا كذا اذا تمللت تشوفوني كل ربع ساعة انزل المطبخ احوس اشوي وارجع ,, يعني اللي يشوفني يقول ان في كل مرة انزل راح احصل شي جديد !! يااخي نفس الصحون والاطباق الي خليتهم قبل ربع ساعة موجودين الحين .. لكن الملل ومايسوي
سويت اشيا مالها داعي ماادري ليش بصراحة ,, وعلى فكرة عندي امتحان بعد تقريبا ساعة ونص ودقيقتين بالضبط اتمنى انكم تدعون لي بالتوفيق ان شاءالله .. (الحمدالله كان الامتحان رائع والدكتور ماقصر بصراحة قعد يحل لنا الاجوبة والغش على افا من يشيل نفس مايقولون يعني ان شاءالله علامتي تكون مرضية, بصراحة اول مرة استانس في امتحان بهالطريقة, استاذنا مدرس في امريكا وكندا ولندن وهو مصري الاصل وبصراحة عقليته متفتحه لدرجة انه اول ماشاف ان اغلب الطلاب محتار في احد الاجوبة قعد يحله معانا في وسط القاعة وامام المراقبين, على الله بس مايسببون له مشاكل وربي يجزيه ويسهل عليه نفس ماسهل علينا)
اتصلت حق مكاني الموقر (القهوة) قلت بروح بقعد باشرب لي شيشة وعصير وخاطري في جوكلت كيك وبادرس اشوي وبروح الجامعة للامتحان, بس لسوء الحظ انهم يفتحون الساعة 10 الصبح من بعد ماكانو يفتحون الساعة 8 ماادري ليش بصراحة !! (بعد الامتحان رحت القهوة وشيشية وطلبت لي موزة بعد قعدت اقشرها واكلها .. بصراحة مادري شهالتصنيفات الي تنزل علي وتوني راجع بعد ماتجمعت وقعدت من الربع سوالف وضحك )
خاطري في حصالة !!
ماادري شطاري علي اليوم ..
خاطري اشتري حصالة .. واعتقد ان الحصالة يعني كل دول الخليج يسمونها حصالة ماادري اذا في حد يسميها غير ..
تذكرون الحصالة الي تجيكم فخار وفيها فتحة صغنطوطة وتحطون فيها العملات !! ماادري شنازل علي اليوم قلت باروح لمصنع الفخار او محل يبيع الفخار وباشتري حصالة لي ولبنات اختي وعيال اخوي بعد لازم, مممم او شكلي باشتري لي بروحي مافيني شدة مصاريف وخساير,, تعرفون بعد اذا شريت حق فلان لازم تشتري حق علان والجماعة والشلة المشتلة كلهم,, بس يستاهلون حبايب قلبي (شريت لي حصالتين hehehehe خليت لي وحدة حق الازمات الي عادي تنكسر بأي وقت والثانية بدايتي فيها بدينارين استخسرت احط اكثر بصراحة )
اعتقد ان عندي عطلة الاسبوع الجاي كامل ,, عطلة من الجامعة فكرت اني اسافر بس بصراحة حسيت اني مصختها واجد واجد !! يعني بصراحة ماعتقد اني بتجرأ اقول لابوي اني ابي اسافر,, يعني وايد الموضوع زاد عن حده هذاني كل اسبوع وترك طقيت الدرب وسافرت ,, الثقل زين والركادة زينة !! باقضب ارضي وبامسكها وبحاول اراجع وادرس اشوي ابرك لي على ماعتقد .. (اعتقد اني بقعد اسوي مشروع مادة التسويق واكيد ابي مساعدتكم في ملئ الاستبيان الي راح اعمله ,, لاتبخلون علي)
ان شاءالله مخطط ان اليوم اذا الله اراد ارد على التعليقات الي شاركتوني فيها ,, ساعات مايكون عندي الوقت الكافي اني ارد واشكركم على تعليقاتكم ,, ليس اهمال او تجاهل بالعكس ,, لو الود ودي اخصص موضوع كامل لكل شخص فيكم اشكره على التواصل الدائم والتعليقات الي دائما ماتسعدني وماعتقد انكم تحسون شكثر يعني لي تواجدكم ومناقشتكم ومشاركتكم معاي .. على الرغم من اني افتقد بعض زوار مدونتي الي عودوني على تواجدهم الدائم ولكن حجة الغايب معاه .. 
(ان شاءالله اوفي بوعدي وارد على تعليقاتكم اليوم يارب بعد مااتغدى او بعد مااصحى من النوم لاني من امس سهران )
ممممممم ..
احس من النادر اني اطلع لنفسي العنان بهالشكل واتكلم بالاسلوب البسيط والعامي بدون مراجعة وتدقيق ,, لكن اتمنى انكم تتقبلون هالاسلوب ولو لمرة وحدة .. احس اني مللتكم من مواضيع الحزن والملل والكآبة وممزقا انا واشوي وبنتحر .. بالعكس الحياة حلوة وتفائلوا بالخير تجدوه ,, الحياة من جد حلوة وخصوصا هالجو الحلو هالايام والبرد الي يخليك تحس بطعم الحياة ونفس ماقال اخوي محمد بن سالم صاحب مدونة وتر في مدونته حرام الواحد مايستغل هالجو بصراحة ,, طلعوا غيرو جو .. حاولو تتمشون في السيارة بدون مكيف ومنزلين الدرايش !! احساس حلو .. (جربو وقولو لي لاتنسووووون)
ماراح اطول عليكم اكثر ,,, بقوم اغير ملابسي واليوم قررت اني البس الجينز والكاب ,, من اول ماداومت وانا دوم ثوب وغترة ثوب وغترة ثوب وغترة ,, وطبعا بين كل محاضرة ومحاضرة اروح وانتو بكرامة دورة المياه عشان اشوف الكشخة اشلون واعدلها, على الرغم من عشقي للثوب والغترة الا ان التغيير حلو ,, (طبعا اغلب الطلاب ماعرفوني حتى دكتوري ركز فيني ليما عرفني)
جددو .. غيرو .. حبو .. اعشقو .. عيشو حياتكم .. من نساكم انسوووووووه ولاتشغلون بالكم معاه ..
تره اللي يضيع فرصة انه يعيش موقف مفرح ,, ماعتقد انه يستاهل انه يعيش سعيد ابدا !!
- التحديث: باللون البرتقالي
عامي الأول
في البداية احب ان اتوجه بجزيل الشكر والامتنان الى اصحاب موقع بحرين بلوغ والقائمين عليه على الدعم المستمر والسريع في اصلاح الخلل المتعلق بموقعي.
ولله الحمد تم اصلاح الخلال ونعاود نشاطنا من اليوم بأذن واحدٍ احد.
في البداية حبيت ان اشارككم فرحتي في اتمامي عامي الاول في عالم التدوين, حيث ان مدونتي اتمت عامها الاول قبل عدة ايام.
مدونتي التي كانت هي الملجأ الوحيد في كثير من الاوقات التي لم اجد فيها احدا ليسمعني دون مقاطعة وليعلم مابي بدون ان يسأل حتى, فقد تركت لي العنان لأطلق مابي من مشاعر, مشاعر حزن سعادة فرح غيض وكبت, شاركتها اجمل واصعب واقسى لحظات حياتي.
مدونتي هذه التي جمعتني بكم, جعلتني اشعر بأن هناك اناس تسرهم وتحزنهم اخباري حتى وان لم تربطني بهم معرفة شخصية في يوم من الايام, مدونتي التي غرست في مبدأ انني لست وحيدا في هذا العالم, فهناك اناسا اشد وحدة مني وظروفهم اشد قسوة مني, مدونتي التي جعلتي اؤمن بأن هناك صداقات قد تبنى عن طريق الانترنت, فقد وجدت الكثير منها هنا عبر هذه الصفحات التي قد تكون بسيطة في نظري ولكن كبيرة في نظر الكثير من زوارها.
الشكر لكم, فلولاكم لما كانت وكنت..
الشكر لكل من ساهم فيها حتى ولو بدون قصد..
لشكر لزواري اليوميين ..
الشكر لمن زارني حتى ولو لمرة واحدة فقط ..
الشكر لمن كان لي صديقا واخا دائما لي, بنصائحه, بآرائه, بدعمه المعنوي ..
الشكر لكل من ساندني من خلال التعليقات او الرسائل البريدية ..
الشكر لكل من ساهم في نشر موقعي بطريقة او بأخرى ..
كل الشكر لكل من ساهم بنجاح مدونتي ..
واكرر شكري وكل الشكر للقائمين على موقع بحرين بلوغ, فلولاهم لما سنحت لي الفرصة لأكون معكم ..
همسة : افتخر بأنني بهذا الموضوع قد اتممت الـ 104 تدوينة وموضوع, حملوا اكثر من 700 تعليق, موزعين على 13 قسم.
السلام عليكم ورحمة الله وبركاته ..
يعاني موقعي حاليا من خلل طارئ مجهول الاسباب قد يؤدي الى حذف مدونتي نهائيا .. اتمنى ان يتم دعمي من قبل اصحاب الموقع الرئيسي www.bahblog.com
الى ذلك الحين ,, استوعدكم الله وبامكانكم بكل تأكيد التواصل عبر البريد الالكتروني او المسنجر mkm1985@hotmail.com
الى لقاء قريب ان شاءالله
لمشاهدة مواضيعي القديمة والارشيف مع التصنيفات يمكنكم استخدام العنوان المؤقت http://gasi.arwp.net