السلام عليكم ورحمة الله وبركاته

شخباركم وشمسوين ؟ ان شاءالله بس تكونون بخير وصحة يارب

انا الحين في الكوفي شوب, ملل في ملل. يومي كان كلش عادي قعدت الصبح وجيت الكافيه العصر وهذي ثاني مرة اجي اشيش اليوم.

 الجو عادي وزحمة الناس حلوة وهذا الي يعجبني بالمكان على الرغم بأن الكل ينتقدني لكوني خجول وانطوائي وماحب اختلط باي شخص كان, ممكن بسبب اني دوم بروحي وماحب اخالط حد واصدقائي نادرين.

وعلى فكرة الزكام ذابحني - شكلهم بيغرموني على الكلينكس الي خلصته لهم -  وحرارتي بدت تنزل, تراني مريض صار لي يومين.

بصراحة في واحد قهرني بالمكان, يمشي ويطول على صوت التلفزيون عشان يكون صوت المباراة عالي. مادري هل على باله انه راعي المكان او انه في بيتهم مثلا ولا شالسالفة بالضبط مب عارف, بس لاتخافون شكيت عليه وراحوا يقعدونه مكانه ورجعو صوت التلفزيونات لمستواها الطبيعي.

ادري ان ماعندي سالفة بس ملل وبروحي وجايب الاب توب احاول اقنع روحي اني بدرس - على فكرة ماعرف ادرس الا في الازعاج والزحمة - وتمللت قلت خلني اتسبب واغثكم شوي وياي مرة وحدة.

جاكي, جوي, ايرلي, ابراهيم, شوكت, مصطفى, و سام . هذولا اسامي الويترس الي يشتغلون بالكافيه والي شفتهم جدامي ومرو علي اليوم. اووه نسيت محمد السخيف الهندي الي يحب يتلزق ويقعد يسولف في مواضيع تافهه مالها اي معنى, وبلال الغبي جايبينه جديد ومايعرف يحط فحم الشيشة عدل. لازم في يوم بصورهم كلهم وانزل لكم صورهم, تراني احبهم ماعليكم مني. صار لي سنة ونص وانا كل يوم هني تقريبا مرتين او ثلاث مرات في اليوم. بكرة اكيد راح امر عليهم بعد الجامعة. دوامي من الساعة 9 لين 2 يعني قومة من النوم الساعة 7 ونص بالكثير. اكره قومة الصبح.

الحين الساعة 11:55 اخليكم, عشان يمديني ارد البيت وارقد.

  يالله Take care وفمان الله وحفظه.

همسة: الخمام اذا نبشته .. طلع خياسه . مثل طرى على بالي يوم شفت شخص ماحبه.

الكلام لك ياجارة: اكره شي على الرجال الثوب الضيق, لو جسمك حلو والله مادري شبتسوي ؟!؟ . وترا قوطي المريتو - النشا - باقل من دينار, اذا ماعندك بشتري لك تحطه في غترتك الذايبة. كشخة وكشخة وراز عمرك وسامت روحت وغترتك ذايبة !؟

 


Share This