الحسد .. والكشحة

 السلام عليكم ورحمة الله وبركاته …

اليوم حبيت ان اذكر لكم موضوع من فترة يراودني, موضوع الحسد المصحوب بالكشحة ايضا!!
والكشحة للاخوان الغير بحرينيين راح يكون معناها (النحس)

انا شخصيا من الاشخاص الي يؤمنون بالحسد وكانوا لايؤمنون بما يسمى بالكشحة.

الحسد:
إنّ الحسد هو تمني زوال النعمة عن المحسود ، وإن لم يصر للحاسد مثلها.
الحسد هو البغض والكراهة لما يراه من حسن حال المحسود.
وقيل :الحسد تمني زوال النعمة عن صاحبها سواء كانت نعمة دين أو دنيا.وقيل: أن تكره النعم على أخيك وتحب زوالها

الحسد ذكر في القرآن ولذلك كنت من المؤمنين ومازلت مؤمن بان الحسد موجود والعين حق, ومن الامثلة الي صادفتني ان في كل عرس من عرس اهلي لازم امرض واقعد اسبوع.
واتذكر ان صديقة امي تقول حق امي: محمد كأنه اهو المعرس. ماتكمل ساعة من كلمتها الا وانا طايح.

الكشحة والنحس:
ماكنت اؤمن فيه, وكنت اعتبره مثل ماتقولون خرافة, او معتقدات.
ولا اعلم بصراحة اذا كان له اساس في الدين او ذكر.
لكن تصدقون اني نهيت علاقتي مع واحد من ربعي بسبب الحسد الي فيه والي اقترن مع النحس, ومب اي نحس, احس من النحس الدرجة الاولى على غرار حروق الدرجة الاولى!!
سبحان الله, ولله في خلقه شئون, كل مايدري عن شي يخترب.
بدون مجاملة اي شي اي شي يحط عينه عليه او يدري انه بيصير, يخترب او مايصير. لدرجة اني احس ويهه صاير منخفس وعينه تصير حمرا, احس كله من آثار الحقد والحسد الي فيه والقهر الي يصيده لما يعرف ان احنا عندنا ربع غيره, وماراح اخش عليكم اني ساعات اذا اني في الكوفي اخلي وحدة تقرا لي الفنجال, على غشمرة طبعا , ان ثنتين ذكروا لي اسمه وقالو لي عنه !!!

احنا مثلا نقول بينا وبين بعض, شوف مثلا ابو فلان شجاب له هدية, او شوف فلان طلع له سيارة جديدة.
ويمكن نذكر هالشي مرة في الشهر !!
لكن اهو يجيبها على هالغرار: ليش احنا مانحصل, فلان وش احسن فيه منا؟! . شالفرق بيني وبينه؟ ليش احنا مالنا حظ !

حسد غير طبيعي, ياخي الرزق في يد الله سبحانه وتعالى.

واحمد ربي اني افترقت منه, فالحمدالله رب العالمين, من يوم ماعلاقتي انتهت وانا من احسن الى احسن.
مابي احسد روحي

لكن مايشغل بالي انه دوم يسأل عني ويسأل انا شسويت ووين رحت ومن ربعي؟!
وخصوصا القروب الي يمشي وياهم الحين يجون ينقلون لي اخباره, واقولهم مابي اسمع اسمه, صدقوني مجرد مااسمع اسمح تجيني حالة لااجد لها وصف. قرف على تغزز وخوف من ان النحس يصيدني منه.

قلت لكم اني ماكنت مصدق بسوالف النحس, ولكن مجرد ماقعدت اجمع الاشياء الي تصيدني, وخصوصا لما بديت اخش عليه او ماقوله الاشيا الصحيحة, وجدت الفرق شاسع !!
فكم يكون حالي باحس حال ومرتاح لما مايعرف الشي, ولما يعرف عنه او حتى يشك يخترب !!

اعوذ بالله من الشيطان الرجيم واعوذ بالله من هالاشكال بصراحة.

حتى ربعه الجدد تضرروا منه, يجون يقولون لنا انا ورفيجي عنه وعن اشلون ناحسهم واشلون يقارن روحه فيني انا ورفيجي واشلون يحسد !!
يعني لا انا ولا هم سالمين من عينه.

امس كان يومي حلو جدا جدا, السيف, سينما, الشيشة , وسهرة من اروع سهرات حياتي, وبعدها تمشيت ويا ربعي وبعدها طلعت ويا رفيجي.
وفي الاخير نزلت كوفي شوب, كان رفيجي ينتظرني هناك, وشفت الكشحة الي اقولكم عنه !!
ماتتخيلون اشلون تغيرت الواني وخفت على عمري وخفت حتى على رفيجي.
خفت ان احنا نتهاوش او يصيده شي لما يشوفه معاي.
فسويت روحي اني داخل ادور على شخص ومالقيته, وشفت واحد من ربعي سلمت عليه كان قاعد وياه, وحتى ماسلمت على الكشحة خفت لما امسك يده ينتقل لي شي او يصيدني مس
واتصلت حق رفيجي الي ينتظرني وقلت له اطلع بره ماعجبني المكان, خبركم الخوف ومايسوي.

وانا طالع بالغلط التفت وشفت الكشحة يطالعني!! نظراته تذكرني بنظرات الشخصية الشريرة في الافلام, ابتسامة وقحة وفيها خبث. ماعرفت معناها ولاابي اعرف معناها
ولكن كل الي اقوله:

بسم الله الرحمن الرحيم
قل أعوذ برب الفلق* من شر ما خلق* ومن شر غاسق اذا وقب* ومن شرالنفاثات في العقد* ومن شر حاسد اذا حسد
صدق الله العظيم

 ومن امس وانا اقرا على نفسي المعوذات, اخاف شي يصيدني لانه طالعني.

مادري هل الي فيني وسواس, او هل خوف على نفسي او حالة نفسية يمكن؟

Share This