صباح الخير والسعادة عليكم جميعا يارب, اكيد انه عنوان غريب وتتسائلون شدخل المرور والصابون والتونة !! بس ان شاءالله راح تعرفون القاسم المشترك بينهم بعد ماتقرون يومي امس وشصار

امس طلعت متأخر عشان اروح الكوفي شوب, ورحت لابس برمودا و T-shirt, والوالد طبعا عطاني كمٍ كلمتين ومحاضرة, وقلت يمكن صج يكون شكلي شاذ في هالبرد انا لابس برمودا لكن مع ذلك طلعت.
واكتشفت اني مب المينون الوحيد في هالديرة, فبعد دخلتي الكوفي بشوي, شفت واحد داش علينا بشورت و cut شيرت !!
فحمدت ربي على نعمة العقل, فعلى الاقل نسيبا انا اعقل منه .

طلعت من الكوفي ومريت شارع المعارض عشان انزل ثيابي في المغسلة, واشوف موتر سيكل وراي, واقول شفيه وراي ذي, وطلع مرور (1) , وماحطيت في بالي انه مستقصدني.
ويوم وقفت عند المغسلة وصل حضرته يمي وطلب الليسن والتسجيل والتأمين !!
وطبعا حضرتي مااخذ الليسن معاي, اصلا بيني وبينكم بوكي خذ له سنة ضايع مع الليسن والبطايق كلها وماطلعت ليسن الا من قبل شهر, لا وازيدكم من الشعر بيت, رجع ضاع مادري وين قطيته.
المهم قلت له ماعندي, قالي بطاقتك السكانيه, قلت له بوكي ضايع, قالي ابي اثبات, قلت له ماعندي الا الجواز وفي البيت.
والظاهر انه مستقصدني فشمعنى من بين السيارات وقفني انا ولا وسأل عني وطلعت السيارة مب مسجلة الي انا ماخذها مالت البيت.

المهم قال لي ان السيارة مب مسجلة واذا ماعليها تأمين ماراح اتحرك !!
مني مناك طلعت له التأمين من بعد مااتصلت بالوالد, ورضا اني اعطيه رقم البطاقة السكانية بدون مااجيب له الجواز.
وفي الاخير حصلت مخالفة شحلوها على اني اسوق سيارة بدون تسجيل.

————–

رجعت البيت وظربني جوع ..
وقلت خلني انزل اسوي لي عشا,

وبقولكم سالفة صادتني في الجامعة سنة 2003, حيث اني كنت مقدم على تخصص تصميم داخلي interior designs , وطلبوني لامتحان ومقابلة.
وباختصار في المقابلة استفزتني الدكتورة وقالت لي انك مابتقدر تثبت وجودك وخصوصا ان دفعتي المقبولة كلها بنات, وقالت لي ان البنات بيكونون احسن منك فجاوبتها وقلت لها: By the way, most of the famous designers in the world are male, we are better than you in everything, fashion design and even in cooking.

اجابتي استفزتها لدرجة انها رسبتني في المقابلة ومضطر من بعدها اني اغير التخصص ولين رسى بي الحال في تخصص التسويق الي انا فيه.

المهم ماطول عليكم, امس حبيت اطلع موهبتي اشوي واثبت حق روحي صحة كلامي, نزلت المطبخ استعداد للعشا.

وطبعا طبق امس كان التونة !!
وباعطيكم الوصفة وادعوا لي مو تضحكون علي

المكونات: قوطي تونة (3) -  بصلة - طماطة - معجون طماطم - جبن كرافت

جبت المقلاة على قولتهم وحطيتها على النار ويوم حطيت الزيت الا اسمع طرطشه واسمع عفسة !! وانا ضايع في الطوشة ابي اعرف شالسالفة؟! وبعد ثواني اكتشفت اني اللي حطيته ماكان الا صابون (2) !! وماكان زيت .

المهم ماطول عليكم, بعد ماتتأكدون ان اللي في يدكم الزيت مب صابون, جيبو البصل وقطعوه شرايح وحطوه في المقلاة.

 

الخطوة الي بعدها انا نجيب حبة الطماطة, ونقطعها مربعات ونحطها بالمقلاة مع البصل, احم احم. نفس الصور الآتيه.

وبعدها نضيف اشوية ماي للمقلاة تقريبا ربع كوب, ونروح حق البهارات, وطبعا لعبتي البهارات. وروح وحط اللي تشوف قدامك !! طبعا مب كل الي جدامك بس في شي اسمه مكتوب عليه سنوت وجلجلان, وايد احب احطه في الاكل, اذا شفتوه حطوه, ومع ملح وفلفل اسود وفلفل احمر وكاري وبزار ولومي اسود مطحون. وقعدو خلطوه بعد ماتحطون قوطي التونة.

وبعد الخلط والمهم في الاخير المفروض يطلع لكم نفس هالصورة , وبالهناء والشفاء.

ملاحظة: مالي ذنب اذا حد صاده تسمم

والحين اجمعوا (1) و (2) و (3) وبتعرفون الرابط المشترك بين المرور والصابون والتونة !!

 

 

 

 

 

 


Share This