السلام عليكم ورحمة الله وبركاته ..

شخباركم؟ ان شاءالله بخير وصحة يارب

الحين الساعة 12:17 صباحا يعني تطلع بره وتشوف الليل بس خبركم طافت الساعة 12 لازم نتفلسف ونقول صباحا.

اليوم طلعت مع رفيجي ورحنا تعشينا في Trader Vic`s اللي في فندق The Ritz Carlton, وتصادف ان عندهم الـ Christmas Eve اللي اهو عشية الكريسمس. قعدنا وطبعا المطعم روعة وجبت لكم صور له من موقعهم. وكنت بصور بس تدرون خفت يقولون اشفيه ذي متخرع.

من الخارج. بس صدقوني في الليل احلى شكله

وطبعا العشاء كان من اجواء الكريسمس وبصراحة ماعجبني يمكن لاني مب متعود على هييييك شغلات.

الستارتر كان Thai, تايلاندي. وبصراحة احس بطني بيعورني منه قريب ان شاءالله. كان يتكون من ربيان وشرايح سالمون مع المنجا, وجايبين معاه خس وراشين فوقه بندق ومكسرات !! قعدت نفس الياهل انقي واحلل واخذ المكسرات اكلهم واهد الباقي, وكلت خسة عن خاطري.

وبعدين طلبنا الشوربة.كانت قشطة اذا ماخاب ظني مع الـ asparagus بصراحة ماعرف شنو يعني بالعربي, وخالطينها مع الجبن الازرق الفاخر. طبعا ذقتها وقلت لها يشيلونها من جدامي لايصير فيني شي.

بعدين جابو لنا الطبق الثالث كان عبارة عن grilled lamb مع باذنجان ومع الـ apple pepper sauce, اللي اهو صلصلة التفاح, والله كان الطبق لاباس فيه. بالعربي يعني كان ريّش لحم بس متفلسفين اشوي.

والمين كورس, الطبق الرئيسي كان قطع ديك رومي مع vegetables and potato. مممممم نوت باد بس ماكملته احس صارت خربطة في بطني.

وآخر شي السويت كان وايد روعة. كان شوكليت بيضا وسودا مع موكا وفواكه.

وآخرتها ختمناها بـ rose tea.

استانست وايد وخصوصا ان وناستي مع الشخص الي انا وياه اكبر من وناستي بالجو والمكان.

وبعدها طبعا ماننسى ان نمر على الشيشة نشيش, والستاف تجمعو علي قبل لااطلع Anna و Jacki و Joy, وخذو وياي صور بتلفوناتهم. وطبعا ويهي صار احمر لان كان قدام الناس ليحين ماصار خالي المكان.

بس الحمدالله وايد استانست, وادعوا لي بكرة عندي امتحان Statistical احصاء, وان شاءالله اقعد الصبح عشان اراجع لان امتحاني الساعة 11. كنت ادري بالامتحان من زمان بس مادري ليش نسيت وماتذكرت الا امس واليوم قعدت اراجع بس ماقدرت اكمل, دعواتكم اهم شي.

فمان الله وحفظه يارب.

 

 

 

 


Share This