اليوم راح اطلع مع شخص يمكن من 2002 ماشفته او قعدت وياه الا قبل اسبوعين تقريبا, شفته بالصدفة وسبحان الله ماتغير في شكله شي وعلى طول عرفني وكان سلامنا حار ماتوقعت انه يذكرني اصلا من الاساس. واكتشفت انه يحمل ميزات كنت اجهلها ويحمل قلب طيب على الرغم من الفكرة الي كنت ماخذها عنه بسبب كلام الناس وكلام اقرب المقربين له من اصدقائه في ذيك الفترة بس عرفت ان العيب مب منه وانما من اللي كان يمثل عليه الصداقة سنين واللي ماحفظ اسرار صديقه, وبالفعل ماستغرب منه لانه صادني نفس الشي وانصدمت فيه على الرغم من ثقتي فيه. اليوم راح نطلع مع بعض مخططين نروح السينما ونتمشى ونتعشى ونعيد الايام الماضية اشوي وخصوصا ان صار لنا اسبوعين على اتصال دايم بس ظروفنا ماتسمح انا نتلاقى.

كان معاي بالثانوية واسمه صقر, كان من المقربين لي في فترة من الفترات ولكن لظروفه الخاصة طلع من المدرسة وراح يكمل في مدرسة ثانية, اتعرفون اكتشفت يوم شفته وقعدت وياه ان بالامكان ان الواحد يتغير للأحسن, لاني بصراحة كنت اؤمن بان التغيير لابد ان يكون للأسوء, بس يمكن لان هذي نظرتنا للحياة مانشوف الا الاشياء السلبية ومانشوف الاشياء الايجابية والمميزة في حياة الشخص.

على ايام الدراسة كان يعتبر من المهملين, ماراح اقول الفاشلين ولكن اهماله واستهتاره كانو كبيرين بالدراسة, وتفاجأت به يوم اشوفه انه يعتبر حاليا اصغر طيار بحريني حيث تم توظيفة كطيار مساعد في طيران الخليج, ومتخرج من امريكا - ماشاءالله لا اله الا الله اللهم لاحسد-. اكتشفت ان عمر الشخص مايعتبر فاشل لان من الممكن بين يوم وليلة انه يتغير, انا وانت وجميع من حوالينا ممكن انهم يتغيرون مب شرط للأسوء نفس ماكنت اظن وانما للأحسن احيانا دام ان الشخص يتحلى بالعزيمة والارادة.

بس حبيت اوجه نصيحة للجميع, عمركم لاتستهينون بأي شخص كان, فمن يصدق بأن المتميزين على ايام الثانوية لم يكملوا الجامعة وبعضهم عاطل والبعض الآخر في وظائف لاترضي الطموح, بينما من كان يعتبرونه فاشلا اصبح اكمل دراسته بامريكا واصبح الآن طيارا !!

فسبحان مغير الاحوال ..


Share This